Hafa móttekið um 15.000 tonn

Fiskiðjuver Síldarvinnslunnar í Neskaupstað hefur tekið á móti ríflega 15.000 tonnum af síld til vinnslu á vertíðinni, að því er segir á heimasíðu Síldarvinnslunnar.

Að sögn Geirs Sigurpáls Hlöðverssonar rekstrarstjóra fiskiðjuversins hefur vinnslan almennt gengið mjög vel fyrir sig. Þá segir hann hráefnið fyrsta flokks en stærsta síldin er heilfryst og einnig eru framleidd samflök og roðlaus flök.

Vertíðin gengið vel

Í gær kom Börkur NK með 860 tonn af síld til vinnslu. Hálfdan Hálfdanarson skipstjóri sagðist vera hæstánægður með vertíðina.

„Hún hefur gengið vel í alla staði. Þessi túr stóð í þrjátíu tíma og aflinn fékkst í þremur holum í Bakkaflóadýpinu. Almennt er dregið í einn til tvo tíma í hverju holi,“ segir Hálfdan. „Síldin sem við fengum núna er heldur smærri en áður en engu að síður er um fínustu síld að ræða sem hentar vel til vinnslu.“

Hann tekur fram að eitthvað fáist af íslenskri sumargotssíld en uppistaða aflans sé þó norsk-íslensk síld. „Nú fer að líða að lokum þessarar vertíðar en í kjölfar hennar verður farið að hyggja að veiðum á íslenskri sumargotssíld,“ segir Hálfdan að lokum.

• Blogga um frétt