Veiðum að ljúka fyrir austan

Nú fer veiðum á norsk–íslenskri síld austur af landinu að ljúka. Í morgun kom skipið Beitir NK til Neskaupstaðar með 1.050 tonn af síld, og hófst vinnsla á aflanum þegar í fiskiðjuveri Síldarvinnslunnar.

Beitir fékk aflann í Bakkaflóadýpinu, og samkvæmt upplýsingum á heimasíðu fyrirtækisins gengur vinnslan vel. „Ég held að megi segja að hún gangi vel. Síldin sem nú berst að landi er heldur smærri en sú sem fékkst fyrr á vertíðinni og það þýðir að heldur minna af henni er heilfryst en meira flakað,“ segir Geir Sigurpáll Hlöðversson, rekstrarstjóri fiskiðjuversins.

Unnið hörðum höndum í fiskiðjuveri Síldarvinnslunnar. Ljósmynd/Síldarvinnslan: Hákon Ernuson

Geir segir að tvö skip sjái verinu nú fyrir hráefni, Beitir og Börkur. „Börkur er nú að veiðum í Norðfjarðardýpinu og er að fiska mjög vel,“ segir hann. Í fiskiðjuverinu sé unnið á tvískiptum vöktum, en að sögn Geirs hefur starfsfólkið fengið helgarfrí upp á síðkastið.

• Blogga um frétt