Varð aflvana nærri landi

Rétt fyrir klukkan 14 í dag barst beiðni frá fiskibát utanvert í Norðfirði sem var aflvana. Fjórir skipverjar voru um borð í bátnum sem var staddur rétt um tvær og hálfa sjómílu austur af Neskaupstað.

Slysavarnafélagið Landsbjörg segir í tilkynningu að báturinn hafi verið þó nokkuð nærri landi og að skipverjar hafi sett út rekankeri meðan beðið var aðstoðar.

Áhöfnin á björgunarskipinu Hafbjörgu í Neskaupstað var boðuð út og lagði Hafbjörgin úr höfn um tíu mínútum eftir að útkall barst.

Í millitíðinni hafði lítill skemmtibátur komið að fiskibátnum og var spotta komið á milli svo hann gæti haldið við fiskibátinn en hann var þá rétt um eina sjómílu frá landi. Hæglætis veður var á svæðinu og ekki mikil hætta búin áhöfn bátsins að sögn Landsbjargar.

Áhöfn Hafbjargar kom taug á milli hennar og fiskibátsins og fimmtán mínútum eftir útkall var lagt af stað inn fjörðinn til hafnar í Neskaupstað. Þangað var komið rétt um þrjúleytið í dag, segir enn fremur.

• Blogga um frétt