Kveður FISK og fer heim að lesa ljóð

Guðrún Sighvatsdóttir, oftast nefnd Gurra, lætur af störfum eftir meira en 30 ár á skrifstofu FISK Seafood á Sauðárkróki. Þetta segir í tilkynningu á vef fyrirtækisins.

Guðrún valdi starfslokadag sinn af kostgæfni en í dag verður hún 65 ára gömul og Kvennafrídagurinn er 50 ára. „Það er langt síðan ég ákvað að þetta væri rétti dagurinn til að láta gott heita,” segir hún. Í tilkynningu FISK kemur fram að Guðrún hafi í tólf ár starfað á skrifstofu Kaupfélags Skagfirðinga og þá hafi hún búið á Siglufirði í fimm ár. Að endingu sneri hún aftur á Sauðárkrók til þess að taka þátt í uppbyggingu sjávarútvegs sem þar átti sér stað og hóf störf hjá FISK.

Stolt af FISK og samstarfsfólkinu

„Ég hef alla tíð verið stolt af því að vinna hjá svo flottu og öflugu fyrirtæki sem FISK Seafood er. Og ekki minnkaði ánægjan fyrir nokkrum dögum þegar það gerðist í fyrsta sinn, á sjötíu ára afmæli félagsins, að allt starfsfólk samstæðunnar hittist í ævintýralegri árshátíðarferð,“ segir Guðrún. „Ég hef verið hluti af mjög góðum og samstilltum hópi sem ég mun auðvitað sakna um leið og ég óska honum og fyrirtækinu alls hins besta um ókomna tíð.“

Nú hefst næsti kafli í lífi Guðrúnar sem segist hlakka til að sinna ýmsu grúski og hafa nægan tíma fyrir ljóðalestur. Guðrún er greinilega hagmælt sjálf en í tilefni af tímamótunum setti hún saman þessa vísu:

Nú fer ég heim að lesa ljóð
og lifa í takti nýjum,
þakka af alhug árin góð
og kveð með óskum hlýjum.

• Blogga um frétt