Umsvif í laxeldi kalla á stækkun hafnar

Áform eru uppi um umfangsmiklar framkvæmdir við Bolungavíkurhöfn sem ætlað er að mæta vaxandi umsvifum í atvinnulífi bæjarins, einkum vegna aukinnar verðmætasköpunar af laxeldi á Vestfjörðum.

Kynning á verkefninu fór fram á opnum fundi í Bolungarvík á miðvikudag en nánar var sagt frá efni hans á vef fréttamiðilsins Bæjarins besta.

Aukin umferð vegna laxeldis

Hafnarstjórn Bolungavíkurkaupstaðar hefur þegar vísað málinu til bæjarstjórnar. Samkvæmt áætlunum felur verkefnið í sér að lengja viðlegukant hafnarinnar um rúmlega 200 metra svo hægt verði að taka á móti stærri skipum, sérstaklega þeim sem tengjast starfsemi laxeldisfyrirtækja.

Auk þess er gert ráð fyrir að breikka og dýpka innsiglinguna og flytja svonefndan Grundargarð. Með þessum breytingum verður hafnarsvæðið betur í stakk búið til að sinna þeirri auknu umferð og starfsemi sem fylgir rekstri Arctic Fish, sem rekur laxasláturhúsið Drimlu á Brimbrjótnum.

Drimla er hátæknivinnsla en uppsetningin og bygging hússins kostaði um 4 milljarða. Ljósmynd/Arctic Fish

Jón Páll Hreinsson hafnarstjóri kynnti áformin á fundinum sem unnin voru af hafnasviði Vegagerðarinnar. Er byggt á rannsóknum og mælingum sem framkvæmdar hafa verið á straumum innan hafnarinnar.

Hlutur hafnarinnar 800 milljónir

Heildarkostnaður verkefnisins er áætlaður um 3 milljarðar króna með virðisaukaskatti. Óskað hefur verið eftir því að framkvæmdin verði tekin inn í næstu samgönguáætlun. Hlutur hafnarinnar sjálfrar í kostnaðinum er talinn nema um 800 milljónum króna.

Landaður afli í Bolungavíkurhöfn hefur aukist verulega eftir að laxeldi tók að vaxa í fjórðungnum. Nú er landað um 35 þúsund tonnum árlega, samanborið við 15–20 þúsund tonn áður. Bent er á að þróunin hafi haft jákvæð áhrif á útflutningstekjur þjóðarbúsins, sem aukist hafi um milljarða króna á ári.

Jón Páll sagði jafnframt á fundinum að aukin útflutningsverðmæti væru helsti rökstuðningurinn fyrir stækkun hafnarinnar og þátttöku ríkisins í kostnaðinum

• Blogga um frétt