Fyrsta síldin að vestan

Skip Síldarvinnslunnar eru farin af stað á veiðum á íslenskri sumargotssíld. Barði NK var fyrstur af stað en hann landaði 1.050 tonnum í Neskaupstað í gærkvöldi.

Samkvæmt Theodóri Haraldssyni skipstjóra Barða tók tíma að finna síldina en hann var að öðru leyti ánægður með veiðina. „Við byrjuðum á að leita út af Faxaflóa og síðan var leitað alveg norður á Hala en síldarfréttir höfðu borist þaðan,“ segir hann í samtali við heimasíðu Síldarvinnslunnar. Á Halanum segir hann þó enga síld hafa verið og því hafi þeir þurft frá að hverfa. Að lokum hafi síldin þó fundist í Jökuldýpinu.

Stærri en norsk-íslenska síldin

„Veiðin gekk vel. Við fengum aflann í þremur holum og dregið var í 2-4 tíma í hverju þeirra,“ segir Theodór og bætir við að í fyrsta holinu hafi fengist 400 tonn, 80 í öðru þeirra og í því þriðja hafi heil 550 tonn skilað sér um borð. „Það var blíðuveður allan túrinn og segja má að síldin sem fékkst sé dæmigerð íslensk sumargotssíld, rétt undir 300 grömmum að þyngd.“ Hann segir menn ánægða með upphaf vertíðarinnar og nú styttist í að haldið verði á árshátíð fyrirtækisins í Póllandi.

Geir Sigurpáll Hlöðversson, rekstrarstjóri fiskiðjuversins í Neskaupstað, segir síldina líta vel út. „Þetta er fallegasta síld en hún er heldur smærri en norsk–íslenska síldin eins og eðlilegt er,“ segir hann. „Vinnslan á síldinni í fiskiðjuverinu gengur vel en verið er að framleiða samflök og roðlaus flök.“

Beitir NK þarf að bíða um sinn eftir því að röðin komi að sér en honum var siglt til Hafnarfjarðar í gær. Þaðan verður síðan haldið á miðin þegar áhöfnin kemur fersk til baka úr árshátíðarferðinni.

• Blogga um frétt