Allir lögðust á eitt og uppsagnir dregnar til baka

Forsvarsmenn SR vélaverkstæðis á Siglufirði hafa ákveðið að draga til baka þær uppsagnir sem tilkynnt var um í haust þegar loka þurfti verkstæðinu vegna þess sem kallað var algjört hrun í verkefnum.

Þetta staðfestir Hafþór Eiríksson stjórnarformaður í samtali við mbl.is. Spurður hvað hefur breyst segir Hafþór að farið hafi verið í ákveðna naflaskoðun á rekstrinum.

Frétt af mbl.is

Hrun í verkefnum leiddi til uppsagna

Lykilstarfsmaður fenginn til baka

„Það er búið að gera ýmislegt til bóta. Við fengum t.d. til okkar mann sem hafði unnið með okkur til fjölda ára í að stýra rekstrinum. Hann er kominn til okkar aftur,“ segir Hafþór sem segir vilja beggja til langtíma samstarfs.

Þá seigr hann að starfsfólkið hafi svolítið gengið í að reyna að afla verkefna, finna tengiliðina sína og taka samtalið. Þá hafi komið í ljós hjá kúnnahópnum vilji til að halda fyrirtækinu starfandi.

„Þannig að það eru bjartari teikn á lofti en auðvitað verður þetta barningur og ekkert sjálfgefið en við treystum okkur núna til að draga þetta til baka. Verkefnastaðan er ágæt og það er aðeins bjartara yfir þessu.“

• Blogga um frétt