Guðmundur í Tungu á leið til Ísafjarðar

Ríkið fjármagnar helming kaupverðsins, en Landsbjörg og björgunarbátasjóðurinn á Ísafirði fjórðung hvort. Hlutur heimamanna í fjármögnuninni er um 90 milljónir, að því er fram kemur á síðunni.

Kemur þar fram að slysavarnadeildir, fyrirtæki á svæðinu og almenningur hafi komið veglega að söfnuninni, en það sem gert hafi gæfumuninn í söfnuninni sé rausnarlegt framlag Guðmundar Ásgeirssonar sem hefur sterka tengingu til Ísafjarðar.

Leysir Gísla Jóns af hólmi

Skipið sem Guðmundur í Tungu leysir af hólmi er Gísli Jóns, en það var smíðað árið 1990 og hefur reynst vel frá því það kom til Ísafjarðar árið 2019. Hefur skipið sinnt á annað hundrað útköllum á tímabilinu og staðið vel fyrir sínu. Gísli Jónsson, sem gamla skipið er nefnt eftir í höfuðið á, vann frækilegt björgunarafrek við björgun áhafnarinnar af Agli rauða sem strandaði undir Grænuhlíð. Gísli var alinn upp á Sléttu og þekkti mjög vel til á þessu svæði.

Í ljósi hins rausnarlega framlags Guðmundar og fjölskyldu var ákveðið að bjóða þeim að velja nýtt nafn á björgunarskipið. Segir í færslunni að það hafi verið gert í góðu samráði við ættingja Gísla Jónssonar. Úr varð að nýja skipið fékk nafnið Guðmundur í Tungu, en Guðmundur var sjómaður og skipstjóri á bátum frá Ísafirði, alinn upp í Neðri-Tungu í Skutulsfirði og var frækinn skipstjóri og mikill aflamaður og kom hann að mörgum björgunum á sínum ferli, þar á meðal björgun 10 manns undir Krýsuvíkurbjargi.