Sjávarútvegsklasi Vestfjarða kallar eftir umsóknum

Sjávarútvegsklasi Vestfjarða auglýsir eftir umsóknum í verkefnið Hafsjór af hugmyndum í sjötta sinn og gefst háskólanemum tækifæri til að sækja um styrki til rannsókna og þróunarverkefna sem tengjast sjávarútvegi.

Markmið verkefnisins er að efla nýsköpun og tengsl háskólasamfélagsins við atvinnulífið á Vestfjörðum, styðja við atvinnuuppbyggingu í sjávarútvegi með tilheyrandi fjölgun starfa, auk þess að stuðla að sjálfbærri nýtingu sjávarauðlinda.

Að sögn Vestfjarðastofu verður í ár lögð sérstök áhersla á verkefni sem stuðla að sjálfbærni og eflingu mannauðs á svæðinu. Þrjú til fimm lokaverkefni munu hljóta styrk og getur hvert þeirra fengið allt að eina milljón króna, allt eftir umfangi og efnistökum en skilyrði er fyrir því að verkefnin tengist sjávarútvegi með einum eða öðrum hætti.

Umsóknarfrestur er til 25. nóvember 2025, og má finna nánari upplýsingar á vef Vestfjarðastofu.

• Blogga um frétt