Síðasti Defenderinn af færibandinu í dag

Næstum 70 árum eftir að fyrsti Land Rover Defender jeppinn kom á sjónarsviðið í kjölfar síðari heimsstyrjaldarinnar, rennur síðasta bifreiðin þeirrar gerðar af færibandinu í dag.

Jeppinn hefur þjónað mörgum ólíkum persónum á sínum langa ferli, þar á meðal James Bond, Winston Churchill, drottningunni og ýmsum meðlimum bresku konungsfjölskyldunnar, að ógleymdum fjölmörgum Íslendingum.

Defenderinn, sem hlaut nafn sitt árið 1990, hefur verið nýttur af breskum hersveitum í Norður-Írlandi, Írak og Afganistan ásamt því sem hann hefur gagnast bændum sem þurfa að komast leiðar sinnar á torfærum svæðum.

Samræmist illa löggjöf nútímans

Vinsældir jeppans hafa þó dvínað auk þess sem löggjöf og tækni hefur náð í skottið á honum að ýmsu leyti. Þannig voru hliðarsæti hans bönnuð af Evrópusambandinu árið 2007 og umhverfis- og öryggisstaðlar nútímans hafa gert hann nær úreltan.

Land Rover fagnaði merki­leg­um tíma­mót­um í júní síðastliðnum þegar tví­millj­ón­asti Def­end­er-jepp­inn var fram­leidd­ur í verk­smiðju Jagu­ar Land Rover í Soli­hull í Bretlandi. Af þessu til­efni var smíðað sér­stakt úr­val­sein­tak af Def­end­er 90 jepp­an­um sem fékk nafnið Def­end­er 2.000.000.

Frétt mbl.is: Tvímilljónasti Defenderinn rennur af færibandinu

Jaguar Land Rover mun framleiða nýja gerð sem bera mun Defender nafnið á næstu árum. Sá jeppi mun þó ekki skarta sömu einkennum og gerðu Defender jeppana einstaka í sjón.