Mazda með nýtt flaggskip

Japanski bílsmiðurinn Mazda frumsýndi það sem hann kallar nýtt flaggskip sitt. Vettvangurinn var alþjóðlega bílasýningin í Los Angeles.

Um er að ræða bílinn Mazda6 Sedan og er ný kynslóð hans sögð hafa tekið miklum breytingum frá forveranum að frágangi og búnaði. Þar á meðal er vélin ný og einnig öryggisbúnaður bílsins.

Tveggja eða fjögurra strokka

Í boði er val um nokkrar vélastærðir en þar á meðal er bensínvélin SKYACTIV-G 2.5 sem er þannig úr garði gerð að hún tekur strokka úr umferð til að auka sparneytnina án þess það bitni á vélaraflinu. Eru skiptin milli tveggja og fjögurra strokka gangs sögð eiga sér stað snurðulaust.

Framendi Mazda6 Sedan hefur verið endurhannaður, þar á meðal grillið. Að útliti og innrými er hönnunin öll sögð kraftmeiri og fágaðri.

Í innréttingunni eru ýmis ný efni, til að mynda japanskur viður sem nær eingöngu hefur verið brúkaður til hljóðfærasmíði.

agas@mbl.is