Landsbjörg fékk 3,3 milljónir

Alls söfnuðust 3,3 milljónir króna til Slysavarnafélagsins Landsbjargar í átaki sem Olíuverzlun Íslands stóð fyrir dagana 28. og 29. desember sl. Þessa tvo daga runnu 5 krónur af hverjum seldum eldsneytislítra hjá Olís og ÓB til Landsbjargar. Þetta kemur fram í fréttatilkynningu.

 Björgunastarf kostar talsvert

„Við erum þakklát fyrir þann góða stuðning sem Olíuverzlun Íslands sýnir félaginu, bæði með þessu átaki, sem og að vera einn af aðalstyrktaraðilum þess undanfarin 5 ár. Þrátt fyrir að allt starfið sé unnið í sjálfboðavinnu kostar mikla fjármuni að halda úti öflugu slysavarna- og björgunarstarfi um land allt. Það er alveg ljóst að án stuðnings almennings og fyrirtækja í landinu mætti starf Slysavarnafélagsins Landsbjargar sín lítils enda kallar úthald björgunarsveita, þjálfun og uppbygging tækjabúnaður þeirra á mikinn tilkostnað,“ segir Jón Svanberg Hjartarson, framkvæmdastjóri Slysavarnafélagsins Landsbjargar enn fremur í tilkynningunni.

Landsmenn styðja við bakið á Landsbjörgu 

„Við erum afar stolt og ánægð að afhenda Slysavarnafélaginu Landsbjörg þessa fjárhæð og þökkum jafnframt viðskiptavinum okkar fyrir að hafa tekið þátt í þessu góða átaki með okkur. Samtökin hafa innan sinna raða þúsundir sjálfboðaliða sem vinna ómetanlegt starf og það er ánægjulegt að sjá hve landsmenn voru reiðubúnir að styðja við bakið á þeim með þessu framlagi,“ segir Jón Ólafur Halldórsson, forstjóri Olís. Jafnframt því að 5 krónur af hverjum seldum eldsneytislítra runnu til samtakanna fengu viðskiptavinir Olís og ÓB einnig 17 króna afslátt af eldsneytislítranum þessa tvo daga.

• Blogga um frétt