Fólksbílar Hyundai aldrei verið vinsælli
Setja bókamerki
Bifreiðasala Hyundai Motor á Evrópumarkaði á fyrsta ársfjórðungi 2018 var sú mesta í sögu fyrirtækisins að því er fram kemur í tilkynningu frá fyrirtækinu, sem byggist á upplýsingum frá Samtökum evrópskra bílaframleiðenda, ACEA.
Alls voru nýskráðir 145.008 Hyundaibílar, flestir af gerðinni Tucson og rafdrifnum bílgerðum. Sala Hyundai á bílum með rafmótor jókst um meira en 50% frá 1. fjórðungi 2017.
Heildarsala fólksbíla Hyundai á fyrsta ársfjórðungi var 7,5% meiri en á sama tímabili 2017, þar af jókst hún um 6,9 prósentustig í Evrópu. Að sögn Thomasar A. Schmid, framkvæmdastjóra rekstrarsviðs Hyundai Motor Europe, bendir árangur fyrirtækisins til þess að vaxandi úrval, falleg hönnun og mikil gæði bifreiða fyrirtækisins höfði sterkt til Evrópubúa óháð einstökum löndum.
„Um þessar mundir sjáum við líka nýjan kaupendahóp sem velur í ríkum mæli borgarsportjeppann Kona, i30 Fastback og sportbílinn i30 N sem eiga sinn þátt í vaxandi söluárangri á markaðnum. Þetta eru kaupendur sem hafa unun af akstri og velja sportlega og kraftmikla bíla. Við sjáum líka fram á enn meiri árangur á næstu mánuðum þegar við kynnum til sögunnar næstu nýjungar; 100% rafdrifna borgarsportjeppann Kona, endurhannaða flaggskipið okkar Santa Fe og rafknúna vetnisbílinn Nexo. Þegar frumsýningum þeirra lýkur um mitta þetta ár verða 90% fólksbíla okkar yngri en tveggja ára,“ segir Schmid.
Æ sterkari á rafbílamarkaði
Hyundai hefur styrkt stöðu sína verulega á evrópskum rafbílamarkaði það sem af er ári þar sem Ioniq-þrenningin hefur fallið í mjög gjöfulan jarðveg meðal neytenda. Ioniq er fyrsta bílamódelið í heiminum þar sem bílkeupendur geta valið um þrjár útfærslur á aflgjafa, sem 100% rafbíl, hlaðanlegan tengitvinnbíl og sem hefðbundinn tvinnbíl. Sala Hyundai á bílum með rafmótor fyrstu þrjá mánuði þessa árs var 50% meiri en sömu mánuði 2017.
Tucson söluhæstur
Sem dæmi um sölu á lykilmörkuðum má nefna að á Spáni jókst sala Hyundai um 34% á fyrsta ársfjórðungi, 24% í Frakklandi og 16% í Þýskalandi. Sportjeppinn Tucson heldur áfram fyrsta sæti sínu sem mest selda gerð Hyundai í Evrópu. Í öðru sæti eru i-gerðirnar i10, i20 og i30 sem eru helstu dráttarklárar Hyundai í átt að því markmiði sínu að verða vinsælasti asíski bílaframleiðandinn í Evrópu árið 2021.
