Fjármálagreinendur verstir, málarar bestir

Málarar og húsasmiðir eru öruggustu bílstjórarnir en læknar og fjármálagreinendur ...
Málarar og húsasmiðir eru öruggustu bílstjórarnir en læknar og fjármálagreinendur þeir óöruggustu. Lögmenn þykja líka skæðir.

Því er haldið fram að ný rannsókn á bótakröfum til tryggingafélaga leiði í ljós í eitt skipti fyrir öll hvaða starfsstéttir skila af sér bestu ökumönnunum og hverjar verstum.

Greining á milljónum breskra tjónaskýrslna bendir til að nokkuð sé hæft í kenningunni um að til séu borgarbúar með meira af peningum á milli handa en heilbrigðri skynsemi, þar sem greinendur á fjármálamarkaði tróna efst á lista yfir slysasæknustu bílstjórana.

Í öðru sæti á tossalistanum eru læknar og í því þriðja fjármálaráðgjafar. Í sætum fjögur til tíu – í þessari röð – eru svo tannlæknar, lyfjafræðingar, fasteignasalar, endurskoðendur, lögmenn, vísindamenn og tölvufræðingar.

Á allt annarri og betri bylgjulengd eru svo málarar, sem mælast öruggustu ökumennirnir út úr rannsókninni. Í öðru sæti urðu húsasmiðir og atvinnubílstjórar eru þriðju bestu, en það eru vonbrigði fyrir þá að komast ekki ofar en í þriðja sæti.

Í sætum fjögur til tíu yfir öruggustu bílstjórana eru – í þessari röð – langskólanemar, slátrarar, bændur, hreingerningamenn, verkamenn, verksmiðjustarfsmenn og kokkar.

Niðurstöðurnar byggjast á rannsókn á 2,6 milljónum tjónaskýrslna tryggingamiðilsins 1st Central. Í henni fékkst mynd af akstri viðkomandi starfsstétta á einkabílum sínum. Félagið segir að það sem mestu varði fyrir ökumenn, óháð því hvort þeir séu málarar eða fjármálagreinendur, sé að vera vel tryggðir. agas@mbl.is