Hönnun Range Rover Velar höfðar til margra og nú er nýtt módel í þeirri bílaseríu að koma á markað. Bíll með sín sjálfstæðu sérkenni og krafta í kögglum.
Til þess að geta borið fram nafnið á þessum nýja bíl án þess að þurfa að stoppa á leiðinni þurfa menn helst vera með langhlauparalungu! Jú, svona hljómar það í kirkjubókunum: „Land Rover Range Rover Velar SVAutobiography Dynamic Edition“.
SV stendur fyrir sérbílasmíði Range Rover, eða Special Vehicles Operations en það gefur til kynna að toppbíll þessi verði smíðaður í takmörkuðu upplagi í eitt ár.
Undir vélarhlífinni er að finna 5,0 lítra hverfilblásna V8-vél sem sögð er 550 hestöfl. Fyrir tilstilli hennar má rífa bílinn úr kyrrstöðu upp í hundraðið á aðeins 4,3 sekúndum. Er topphraði bílsins 274 km/klst sem er gríðarlegt fyrir fullvaxinn fjölskyldujeppa.
Nýtt grill, nýir stuðarar framan greina þennan sérbíl frá hófsamari fjölskyldumeðlimum. Sérblandað bláleitt lakk að nafni Satin Byron Blue verður einungis í boði fyrir SVAutobiography Dynamic Edition, og öll módelin eru með þaki í svörtum lit, Narvik Black. Annars má velja um sex mismunandi liti á bílinn og fjórar mismunandi litasamsetningar í innanrými hans en þar er svonefnt Windsor leður ráðandi.