Harður toppslagur í hermakappakstri

Hefð hefur skapast fyrir því að keppendur skreyti bíla sína ...
Hefð hefur skapast fyrir því að keppendur skreyti bíla sína með merki vinnustaðar síns og merki bílablaðs Morgunblaðsins.

Íslensku mótaröðinni í kappaksturs-tölvuleiknum Gran Turismo Sport fer senn að ljúka. Í kvöld fer fram ellefti kappaksturinn af tólf á þessu keppnistímabili og ferðinni heitið á Fuji Speedway-kappakstursbrautina, við rætur sjálfs Fuji-fjalls. Verða það bílar í styrkleikaflokknum Super GT (Group 2) sem etja kappi

Guðfinnur Þorvaldsson, sem stofnaði GTS Iceland í fyrra, segir að áhuginn á mótaröðinni hafi aukist hratt undanfarin misseri og er nú svo komið að færri en vilja komast að í aðalkeppninni. Er því fyrirhugað að bæta við nýrri deild svo fleiri geti skemmt sér, og sýnt hvað í þeim býr, í tölvuleikjakappakstri.

Vaxandi áhugi þýðir m.a. að keppnin um efstu sætin fer harðnandi og margir sem leggja mikinn metnað í að bæta sig sífellt sem ökumenn. Er nú svo komið að mjótt er á mununum í fjórum efstu sætum stigakeppninnar og ekki nema eitt stig sem skilur á milli fyrsta og annars sætis. „Í dag eru fjórir-fimm keppendur sem eiga raunhæfan möguleika á að taka fyrsta sætið og má lítið út af bera hjá þeim sem eru í toppslagnum,“ segir Guðfinnur.

Formúlulið komin í hermana

Hermikappakstur nýtur vaxandi vinsælda bæði á Íslandi sem úti í heimi og er nú svo komið að hermakappakstur er meira að segja á keppnisdagatali Akstursíþróttasambands Íslands. „Þessi íþróttagrein, líkt og margar aðrar rafíþróttagreinar, hefur sótt hratt á og núna halda t.d. mörg Formúlu 1-lið einnig úti hermikappaksturs-liði,“ segir Guðfinnur og bendir á að kappakstursleikir og hermar séu orðnir svo fullkomnir í dag að upplifunin þyki nauðalík því að sitja á bak við stýrið á alvörukappakstursbíl úti á alvörukappakstursbraut.

„Í öllum meginatriðum kallar hermikappakstur á sams konar þjálfun og hæfileika og býður upp á mikla spennu, en munurinn er sá að hermikappakstur er langtum ódýrari en aðrar akstursíþróttir. Tölva, stýri og pedalar kosta varla á við eitt dekk á keppnisbíl og þarf ekki að borga fyrir bensín, viðgerðir og viðhald. Svo er hægt um vik að skjótast í stuttan kappakstur í stofusjónvarpinu eftir kvöldmat.“

Kappaksturinn í dag hefst með tímatöku kl. 21:45 og sjálf keppnin hefst kl. 22. Farnir verða 38 hringir og hægt að fylgjast með beinni útsendingu nokkurra keppenda á eftirfarandi slóðum:

Guðfinnur Þorvaldsson

Sindri Rafn Ragnarsson 

Snorri Þorvaldsson

Lokakeppnin fer fram 19. júní með 120 mínútna þolakstri á norðurhring Nürburgring.

Nánari upplýsingar má finna hjá Facebook-hóp GTS Iceland eða á vefsíðunni GTSIceland.com.

mbl.is