Hyundai einn af þeim bestu

Hyundai Santa Fe.
Hyundai Santa Fe.

Samkvæmt nýrri skýrslu J.D. Power er Hyundai næsta besti almenni bílaframleiðandi heims vegna lágrar bilanatíðni og skoraði Santa FE hæst allra í flokki meðalstórra jepplinga.

Þetta er annað árið í röð sem gæði og lág bilanatíðni Hyundai á Bandaríkjamarkaði eru metin þau næst bestu hjá J.D. Power og fækkaði bilanatilkynningum notenda Hyundai milli ára á sama tíma og skýrslan í ár sýnir að fleiri bílgerðir eru að lakari gæðum núna en í síðustu skýrslu, að því er segir í tilkynningu.

Nýjasta kynslóð jepplingsins Santa FE skoraði hæst í ár í flokki meðalstórra jepplinga, en einnig gekk öðrum bílgerðum Hyundai vel í skýrslu ársins, þar á meðal Tucson, Elantra, Accent og Veloster sem allir hlutu önnur verðlaun í sínum flokki á Bandaríkjamarkaði auk Kona og Sonata sem hlutu þriðju verðlaun.

Þá er Hyundai jafnframt einn þriggja bílaframleiðenda heims sem framleiða mestu gæðin á markaðnum. Hinir eru lúxusbílaframleiðandinn Genesis, sem er dótturfyrirtæki Hyundai, og systurfyrirtækið Kia sem skoraði hæst í ár.

Bestur í tveimur flokkum

Hyundai sem bílaframleiðandi skoraði hæst í tveimur flokkum af átta með fæstar bilanatilkynningar frá eigendum varðandi annars vegar afþreyingar-, samskipta- og leiðsagnarkerfi bílanna og hins vegar bílsætin. Einnig skoðaði J.D. Power tilkynnt vandamál varðandi hönnun og frágang nýrra bíla og tilkynntu notendur Hyundai fæst slík vandamál í flokki almennra bílaframleiðenda í skýrslunni 2019.

mbl.is