Sektað vegna síma í gríð og erg

Að sögn tryggingafyrirtækisins Direct Line, sem kannaði málið fyrir dómsmálaráðuneytið í London, voru rúmlega 13.000 ökumenn gómaðir við að tala í síma á ferð og sektaðir árið 2018. 

Samkvæmt lögum frá í mars 2017 nemur sekt fyrir brot af þessu tagi 200 sterlingspundum, jafnvirði 32.000 króna, auk sex skírteinispunkta. Fyrir það var sektin 100 pund og þrír punktar.

Talsmenn Direct Line segja að aldrei sé það nógu oft brýnt fyrir bílstjórum að láta símann ónotaðan í akstri. Hátternið sé ekki bara ólöglegt heldur og stórhættulegt. Leiði athyglin ökumann frá veginum þurfi jafnvel ekki nema sekúndu til að hann valdi slys og komi sér á sakarskrá.