Sjö í lokaslaginn
Setja bókamerki
Bíll ársins í Evrópu er viðurkenning sem bílaframleiðendum þykir fengur í. Nýtist nafnbótin vel í markaðsstarfi.
Óðum líður að tilkynnt verði um verðlaunabíl ársins 2020 en sjö bílar eru komnir í lokalotuna. Eru það BMW 1-serían, Ford Puma, Peugeot 208, Porsche Taycan, Renault Clio, Tesla Model 3 og Toyota Corolla.
Einn af þessum mun hljóta titilinn en í dómnefnd verðlaunanna eru bílablaðamenn víðs vegar að úr Evrópu. Fjöldi þeirra frá einstökum ríkjum ræðst af stærð og styrk bílamarkaðarins þeirra.
Ekki er keppt í flokkum heldur aðeins útnefndur einn bíll sem bestu kaupin af urmul framúrskarandi bíla. Úrslitin verða tilkynnt á bílasýningunni í Genf í mars nk.
Til að teljast gjaldgengur þarf bíllinn að vera af nýjustu gerð og henta alþýðu manna og ætluð sala minnst eittþúsund eintök á ári. Ekki koma til greina módel sem fengið hafa andlitsupplyftingu á árinu. Loks verður hann að hafa verið kominn á götuna í minnst fimm Evrópulöndum fyrir komandi áramót.
