Dacia kynnir rafbíl

Rúmenski bílaframleiðandinn Dacia, hvers bílar sem notið mikilla vinsælda á undanförnum, hyggst kynna rafbíl á næsta ári, þann fyrsta frá fyrirtækinu. 

Dacia hefur orð á sér fyrir að smíða vel búna og endingargóða bíla með lága bilanatíðni sem framleiðandinn hefur boðið á sérlega hagstæðu verði.

Þannig eru t.d. litli fólksbíllinn Sandero, skutbíllinn Logan og jepplingurinn Duster einhverjir vinsælustu bílarnir í sínum flokki á mörkuðum Evrópu, ekki síst meðal einstaklinga, en alls hafa um 6,5 milljónir bíla frá Dacia verið seldir í álfunni.

Nú hyggst Dacia brjóta nýtt blað í sögu sinni með kynningu á fyrsta rafbíl sínum 2021. Hann hefur sem stendur vinnuheitið Spring og segja talsmenn Dacia að hann verði eins og aðrir bílar fyrirtækisins boðinn á mjög viðráðanlegu verði í samræmi við stefnu fyrirtækisins á neytendamarkaði.

Dacia Spring

Rafbíllinn Dacia Spring verður boðinn í samræmi við sömu framtíðarhugsjónir móðurfélagsins, Renault, sem hefur að markmiði að gera sem flestum kleift að njóta viðráðanlegra og sjálfbærra samgangna án þess að fórna lykilstefnumiðum Dacia. Spring verður einfaldur og áreiðanlegur fjögurra manna, 100% rafdrifinn fimm dyra borgarbíll með að minnsta kosti 200 km drægi. „Bíllinn á einkum að höfða til stærsta viðskiptavinahópsins sem eru þeir sem ekki vilja eyða of miklum peningum til fjárfestingar í bíl til einkanota,“ segir í tilkynningu.