Bíll ársins á sigurhátíð hjá Toyota

Á morgun, laugardaginn 24. apríl, verður sýning og sigurhátíð hjá öllum viðurkenndum söluaðilum Toyota þar sem því verður fagnað að Yaris var nýlega útnefndur bíll ársins í Evrópu 2021.

Á sýningunni gefst gott tækifæri að skoða og reynsluaka þessum skemmtilega bíl sem Íslendingar hafa alltaf kunnað að meta frá því hann kom fyrst fram á sjónarsviði árið 1999. Síðan þá hafa meira en 14.000 Yarisar selst á Íslandi enda bíll sem höfðar til allra aldurshópa og hentar til margvíslegra nota, eins og komist er að orði í tilkynningu.

Yaris er með nýja spræka bensínvél og fjórðu kynslóðar tvíaflsrás sem tryggir lítinn útblástur og litla bensíneyðslu. Tvinnkerfið var nefnt sérstaklega i úrskurði dómnefndar um bíl ársins vegna lítils útblásturs og þæginda í akstri.

Nýr Yaris er fáanlegur í nokkrum útfærslum og auðvelt er að sníða bílinn að þörfum hvers og eins. Verð á Yaris með 1,0 lítra bensínvél er frá 3.320.000 krónum.

Yaris með 1,5 lítra bensínvél og Yaris Hybrid kosta frá 3.850.000 kr.

Gjafabréf frá Icelandair að verðmæti 100.000 kr. fylgir hverjum Yaris Hybrid sem selst á sýningunni.

Sýning og sigurhátíð verður hjá  viðurkenndum söluaðilum Toyota í Kauptúni, Reykjanesbæ á Akureyri og Selfossi á laugardag kl. 10 – 16 og þar má einnig reynsluaka þessum sívinsæla bíl.