Ekki er langt síðan hröðun rafbíla var ekki beinlínis rafmögnuð hvað snerpu varðar. Mikið hefur breyst á nokkrum árum, frá því Nissan Leaf kom fyrst á markað, hvað tækni og rafgeyma varðar.
Leaf stendur áfram fyrir sínu enda hefur hann einnig þróast talsvert á sínu skeiði.
Breska bílaritið Autocar hefur tekið saman lista yfir 12 hraðskreiðustu rafbílana. Byggir hann á þeim upplýsingum sem seljendur lofa kaupendum er þeir aka burt úr viðkomandi bílaumboði.
Á listanum eru bílar sem ekki eru enn komnir á götuna en eru væntanlegir á næstu mánuðum.
Langhraðskreiðastur reyndist sportbíll að nafni Aspark Owl. Uppgefin hröðun úr kyrrstöðu í hundraðið aðeins 1,72 sekúndur. Takmarkið með smíði Uglunnar var að framleiða hraðskreiðasta rafbíl sögunnar.
Virðist ekki betur en það sé höfundum Uglunnar að takast en bíllinn hefur verið í þróun í nokkur ár. Hugmyndaeintak leit dagsins ljós 2017, frumgerð tveimur árum síðar og framleiðsla var svo hafin í fyrra, árið 2020. Hann er framleiddur hjá MAT í Tórínó á Ítalíu (Manifattura Automobili Torino). Framleidd verða aðeins 20 eintök og er listaverðið 2,5 milljónir evra eintakið, eða um 310 milljónir íslenskra króna.
Listinn yfir hraðskreiðustu rafbílana er sem hér segir, í öfugri röð:
* Audi RS E-tron GT Quattro 3,1 sek.
* Tesla Model 3 3,1 sek.
* Lotus Evija 2,9 sek.
* Nio EP9 2,7 sek.
* Porsche Taycan Turbo S 2,6 sek.
* Tesla Model X Plaid 2,5 sek.
* Faraday Future FF91 2,2 sek.
* Pininfarina Battista 2,0 sek.
* Tesla Model S Plaid 1,99 sek.
* Tesla Roadster 1,9 sek.
* Rimac C Two 1,85 sek.
* Aspark Owl 1,72 sek.
agas@mbl.is