Sala á sænska rafbílnum Polestar 2 hefst hér á landi í dag. Það er í fyrsta sinn sem bílar framleiðandans fara í sölu hér á landi en þeirra hefur verið beðið með mikilli eftirvæntingu meðal bílaáhugafólks.
Egill Jóhannsson, forstjóri Brimborgar umboðsaðila Polestar á Íslandi, segir að hans fólk merki strax mikinn áhuga á Polestar 2 og segir ljóst að Íslendingar séu áfjáðir í að komast á hreina rafbíla.
Polestar 2 er hreinn rafbíll, snöggur og snar, á viðráðanlegu verði. Tímabundinn sýningarsalur fyrir Polestar hefur opnað í húsakynnum Brimborg. Í mars á næsta ári er svo fyrirhugað að opna varanlegan sýningarsal fyrir Polestar.
Blaðamaður hefur þegar fengið að reynsluaka nýjum Polestar 2 og er óhætt að segja að hann komi á óvart.