Rapparinn Future varð faðir í fimmta sinn á dögunum þegar fyrirsætan og framkvæmdastjórinn Joie Chavis eignaðist drenginn Hendrix. Fyrir átti hann fjögur önnur börn með fjórum öðrum konum.
Hinn 35 ára gamli rappari á meðal annars fjögurra ára gamalt barn með söngkonunni Ciöru. Voru þau trúlofuð en söngkonan sleit trúlofuninni nokkrum mánuðum eftir að sonur þeirra kom í heiminn. Bæði Ciara og önnur barnsmóðir hans, Jessica Smith, hafa farið í mál við hann en Future er ekki beint talinn hafa staðið sig í stykkinu í föðurhlutverkinu.
Future er vinsæll rappari í Bandaríkjunum en í fyrra átti hann að halda tónleika í Laugardalshöll. Tónleikunum var hins vegar aflýst. Sagði Ísleifur Þórhallsson hjá Senu þá í frétt mbl.is að margt hefði spilað inn í ákvörðunina en viðurkenndi að miðasalan hefði mátt ganga betur.