Segir ólíklegt að fóstrið lifi

Hjónin Hilaria og Alec Baldwin sögðu nýlega frá því að þau langaði að eignast sitt fimmta barn saman. Þungun átti sér stað en frú Baldwin greindi frá því á Instagram í dag að hún væri líklega að missa fóstrið. Hún segir óþolandi að þurfa að leyna meðgöngunni fyrsta þriðjunginn og vill taka þátt í því að opna umræðuna um fósturlát. 

„Ég vil deila því með ykkur að ég er að öllum líkindum að upplifa fósturlát,“ byrjaði Baldwin á að skrifa við mynd af sér á nærfötunum þar sem hún heldur um maga sinn. Segist hún vilja deila því sem hún er að upplifa þó svo það sé ekki jákvæð glansmynd. Segir hún mikilvægt að sýna sannleikann. 

„Svo það sem er í gangi: fósturvísirinn er með hjartslátt en ekki sterkan og barnið stækkar ekki mikið. Svo við bíðum - og það er erfitt. Svo mikil óvissa en það er mjög, mjög ólíklegt að þetta sé lífvænleg þungun. Ég hef fulla trú á því að ég og fjölskylda mín munum komast í gegnum þetta þó svo ferðalagið sé erfitt,“ skrifar frú Balwdin sem segist vera heppin að eiga börnin sín. 

„Endilega verið góð í athugasemdum ykkar. Ég er viðkvæm og þarf á stuðningi að halda. Ég vona að með því að deila þessu leggi ég mitt af mörkum til að auka meðvitund um þetta viðkvæma málefni,“ skrifar hún að lokum. 

• Blogga um frétt