Madonna er strangari móðir nú þegar hún er sextug með sex börn en þegar hún var yngri. Segir Madonna að hún leyfi ekki 13 ára syni sínum, David, að eiga síma enda hefur hún slæma reynslu af símanotkun í tilviki eldri barna sinna.
Í viðtali við Vogue lýsir hún því sem mistökum að gefa eldri börnum sínum síma þegar þau voru 13 ára. „Það endaði samband mitt við þau í rauninni. Ekki algjörlega en það varð mjög, mjög stór þáttur af lífi þeirra,“ sagði Madonna og segir eldri börn sín hafa verið mjög upptekin af símanum, byrjað að bera sig saman við annað fólk sem sé slæmt fyrir þroska.
Madonna á sex börn en hún gekk sjálf með þau Lourdes sem fædd er árið 1996 og soninn Rocco sem hún eignaðist með fyrrverandi eiginmanni sínum Guy Ritchie árið 2000. Í febrúar árið 2017 ættleiddi hún þá fjögurra ára gamlar tvíburasystur frá Malaví sem heita Esther og Stella. Áður hafði hún ættleitt David árið 2006 en það tók nokkur ár og dómsmál að fá loksins ættleiðingu dótturinnar Mercy í gegn árið 2009.
Madonna er ekki fyrsta stjarnan sem er með þessa símareglu á heimilinu en ekki er langt síðan að leikkonan Nicole Kidman greindi frá því að dætur hennar og Keith Urban ættu ekki síma.