Madonna er ekki bara ein frægasta söngkona í heimi hún er einnig einstæð sex barna móðir. Börnin hennar takast mismunandi á við frægðina eins og hún greindi frá í útvarpsþætti á dögum að því fram kemur á vef People.
Madonna segir að eldri börnum hennar sé nákvæmlega sama um frægð móður sinnar á meðan þeim yngri finnist hún fyndin. „Mamma, af hverju eru allir að spyrja hvort Madonna sé mamma okkar?“ sagði Madonna að sex ára gömlu tvíburastelpurnar hennar, Estere og Stella, hafi spurt sig daginn sem viðtalið var tekið. „Nei, Madame X er móðir okkar,“ sögðust stelpurnar svara þegar þær væru spurðar um nafn móður sinnar.
Madame X er nýjasta plata Madonnu og svo virðist sem sex ára gömlu dætur hennar séu duglegar að auglýsa plötuna fyrir móður sína.
Hér fyrir neðan má sjá Madonnu með öll sex börn sín en hún býr í Portúgal með börnum sínum. Madonna gekk sjálf með þau Lourdes sem fædd er árið 1996 og soninn Rocco sem hún eignaðist með fyrrverandi eiginmanni sínum Guy Ritchie árið 2000. Í febrúar árið 2017 ættleiddi hún fjögurra ára gamlar tvíburasysturnar frá Malaví. Áður hafði hún ættleitt David árið 2006 en það tók nokkur ár og dómsmál að fá loksins ættleiðingu dótturinnar Mercy í gegn árið 2009.