Katrín hertogaynja af Cambridge fylgdist með störfum ljósmæðra og fæðingarlækna tvo daga í þessari viku. Katrín fylgdist með störfum á Kingston-fæðingarsjúkrahúsinu í London.
Dvölin á sjúkrahúsinu var hluti af verkefninu hennar Early Years sem miðar að því að skoða betur hvaða áhrif fyrstu fimm árin í lífi fólks hafa. Ekki var tilkynnt um „starfsnám“ Katrínar fyrir fram heldur kemur það fram í vefdagbók konungsfjölskyldunnar.
Katrín á sjálf þrjú börn, þau Georg, Karlottu og Lúðvík. Mörg þeirra verkefna sem Katrín hefur á sínum snærum snúa að velferð barna og hefur hún lagt mikið kapp á að bæta aðstöðu barna í Bretlandi.
Fyrr í haust kynnti hún sér East Anglia's-barnaspítalann, þar sem langveik börn og ungt fólk dvelur. Hún er verndari barnaspítalans.