Fyrirsætan Blacc Chyna er síður en svo sátt með fyrrverandi mágkonu sína Kylie Jenner um þessar mundir. Jenner bauð þriggja ára dóttur Chyna, sem hún á með bróður Jenner Rob Kardashian, í þyrluflug á afmælisdaginn hennar í fyrra.
Jenner leigði sömu þyrlu og körfuboltamaðurinn Kobe Bryant sem lést í slysi með þyrlunni á sunnudag í Calabasas í Bandaríkjunum.
Samkvæmt heimildum People fékk Jenner ekki leyfi frá Chyna til þess að fara með Dream um borð í þyrlu. Lögmaður Chyna sagði í tilkynningu í gær Chyna hefði aldrei gefið leyfi sitt fyrir flugferðinni.
„Ekkert foreldri á að þurfa að komast að því eftir á að barnið þess hafi tekið þátt í hættulegum gjörningi án leyfis þess,“ sagði lögmaðurinn.
Jenner greindi frá því á Instagram-síðu sinni í gær að hún hafi reglulega leigt umrædda þyrlu og þekkti flugmanninn vel. Í nóvember birti hún líka myndir af Dream um borð í þyrlunni og fyrir utan þyrluna.
Chyna og Kardashian hafa átt í háværum deilum um forræðið yfir Dream og skjóta reglulega föstum skotum að hvort öðru í fjölmiðlum. Bæði hafa þau gagnrýnt hæfni hvort annars til þess að annast dótturina, en þau deila nú jöfnu forræði yfir henni.