Annie Mist opnar sig um fyrstu vikurnar

Crossfitstjarnan Annie Mist Þórisdóttir á von á sínu fyrsta barni í sumar með kærasta sínum Frederik Aeg­idius. Hún leyfir aðdáendum sínum að fylgjast vel með meðgöngunni en hún opnaði sig um fyrstu vikurnar í myndbandi sem hún deildi á Youtube. Í myndbandinu segir hún meðal annars ýmsar spurningar vakna á fyrstu vikum meðgöngu. 

Annie greinir meðal annars frá því að hafa verið í New York þegar hún ákvað að taka óléttupróf. Eftir að hún tók prófið hljóp hún grátandi inn í eldhús og fann fyrir alls konar tilfinningum, meðal annars gleði og hræðslu. Foreldrar Annie voru í New York hjá henni og Frederik og gistu í sömu íbúð svo hún gat deilt gleðifréttunum með foreldrum sínum. Hún lét einnig þjálfara sinn vita. 

Frétt af mbl.is

Annie Mist á von á dóttur

Annie segir að sér hafi liðið ágætlega en hún fann þó fyrir verkjum vinstra megin í líkama á æfingum þegar hún var komin um sex vikur á leið. Hún fór til læknis þar sem upp komu þær áhyggjur að fóstrið væri ekki á réttum stað. Við skoðun kom í ljós að allt var í lagi. Annars segir Annie að hún hafi haft það nokkuð gott á fyrsta þriðjungi meðgöngunnar og ekki hafa fundið fyrir mikilli ógleði. Hún viðurkennir þó að finna fyrir löngun í annars konar mat en venjulega. Hún finnur fyrir minni löngun í kjöt og meiri í kolvetni og fitu. 

Íþróttastjarnan nýtir myndbandið meðal annars til þess að tala um hvernig hún æfir og segir að hún æfi ekki til þess að verða betri. Í staðinn reynir hún að viðhalda styrk sínum og segir að æfingar ættu að gera bæði henni og ófæddu barni hennar gott. 

Í spilaranum hér að neðan má horfa á myndbandið í heild sinni en Annie talar ensku í myndbandinu. 

• Blogga um frétt