Skólahreysti mun ekki fara fram dagana 18., 19. og 25. mars næstkomandi vegna samkomubanns yfir 100 manns sem tekur gildi á mánudaginn kemur. Keppnin verður færð fram í maí en nánari dagsetningar verða gefnar út þegar nær dregur.
Í tilkynningu frá Skólahreysti á Facebook segir: „Í ljósi nýjustu upplýsinga frá heilbrigðisráðherra í dag þá eru forsendur okkar brostnar til að halda Skólahreysti 18. og 19. í Hafnarfirði og 25. mars á Egilsstöðum þar sem samgöngubann tekur gildi 15. mars. Einnig munum við færa dagsetningu úrslita sem áttu að fara fram 29. apríl.
Við höfum því ákveðið að halda Skólahreysti í byrjun maí.
Við sendum nýjar dagsetningar þegar við sjáum betur hvað hentar best og hvað er í lagi miðað við ástand Covid-19 þá. Við munum halda áfram að fylgjast með fréttum og vinna skv því.“
Áður hafði verið ákveðið að streyma keppnunum 18. og 19. mars í beinni útsendingu á Facebook en ekkert verður af því.