„Foreldrahlutverkið getur sannarlega verið streituvaldandi á margan hátt, það að hlúa að öllum þeim ólíku þörfum sem börnin okkar hafa. Hugsanir og jafnvel áhyggjur af einhverju sem við erum að fara að gera á eftir, á morgun eða í næstu viku geta valdið streitu og sett okkur á sjálfstýringu. Þegar margir boltar eru á lofti, er auðvelt að rugla saman löngunum og þörfum – fixi og næringu. Við dettum mögulega í að fara að kaupa og gera í stað þess að vera, að vera á sjálfstýringu í stað núvitundar,“ segir Ragnhildur Birna Hauksdóttir fjölskyldufræðingur í sínum nýjasta pistli: 

Ragnhildur Birna Hauksdóttir.

Núvitundaræfingar fjalla um að upplifa og taka eftir án þess að dæma. Ótal rannsóknir sýna að það að verða vitni að núinu á þennan hátt dregur úr streitu, kvíða og þunglyndi og eykur um leið athygli og vellíðan. Minni dómharka eykur samkennd og rannsóknir sýna að tengsl eru á milli getunnar til að sýna samkennd í eigin garð og getu til að setja heilbrigð mörk. Við getum kennt börnunum okkar að þróa slíkt hugarfar.

Stundum er það einfalda best – eins og Eckhart Tolle segir: Að finna gleðina í að vera. Hér eru tvær frábærar leiðir til þess.

Ganga saman í þögn og hlusta: Ganga með börnunum okkar getur stillt okkur inn í dásamlegt jafnvægi og um leið aukið nánd. Við getum verið að hlusta á brakið í grasinu, þögnina, fuglana eða annað sem er í kringum okkur. Hvaðan koma hljóðin? Eru þau náttúruleg eða frá öðru fólki eða vélum? Hlusta, taka eftir án þess að dæma.

Matartími í núvitund: Það er hægt að nota matartímann til að æfa núvitund, að taka eftir án þess að dæma. Horfa á matinn, lit hans og form, hlusta, finna áferð og lykt. Smakka með því að láta matinn á tunguna án þess að tyggja strax, hvernig er hægt að lýsa þessu bragði?

Það eru fjölmargar aðrar leiðir til að auka núvitund í fjölskyldunni og gaman að prófa sig áfram. Oftast er það einfalda best og þegar okkur sem foreldrum tekst að gefa börnunum okkar augnablikið á þann hátt að við tökum eftir án þess að fella nokkra dóma, þá erum við að kenna dýrmæta lexíu. Það vex sem veitt er athygli.

Tengdar fréttir

Ragnhildur Birna fjölskyldumeðferðarfræðingur

Alkóhólismi og bataferðlag fjölskyldu: Hvað er til ráða?

• „Dóttir mín fann hamingjuna í Islam“
• „Ég þrái svo að tveir þeir eldri fari að flytja að heiman“
• Sex ráð fyrir foreldra sem eru að skilja
• Þegar foreldri er í fangelsi

» Fleiri tengdar fréttir

Stöndum saman

Þetta gerir Þórólfur þegar útlitið er svart: „Búin að vera þung vika“

• Nettó veitir 44 milljónir króna til góðgerðarmála
• Partíréttirnir sem Siggi Gunnars mælir með fyrir kvöldið!
• „Kirkjan er opin og kemur til þín“
• 400 krakka hópdans í morgunsólinni

» Fleiri tengdar fréttir

• Blogga um frétt