One Direction-stjarnan Zayn Malik og fyrirsætan Gigi Hadid eiga von á sínu fyrsta barni saman. Foreldrarnir verðandi hafa ekki tilkynnt um erfingjann sjálf en bæði ET og TMZ staðfesta að þau eiga von á barni saman.
Malik og Hadid kynntust fyrst árið 2015 og í nóvember sama ár var greint frá því að þau væru í sambandi. Þau hættu saman í mars 2018 en fundu fljótt aftur ástina í örmum hvort annars. Í janúar 2019 bárust svo fréttir að þau væru hætt saman. Þau byrjuðu svo aftur saman í lok síðasta árs og nú eiga þau von á barni saman.
Samkvæmt heimildum ET er Hadid gengin 20 vikur á leið.
„Gigi hefur gætt þessa leyndarmáls og aðeins sagt sinni nánustu fjölskyldu og vinum, hún er gengin nokkra mánuði á leið. Þegar Gigi og Zayn byrjuðu aftur saman í lok síðasta árs var eins og þau hefðu aldrei hætt saman og vissu að það sem þau eiga saman er einstakt. Parið og fjölskyldur þeirra eru himinlifandi,“ sagði heimildarmaður ET.