Kona Jamies Olivers missti fóstur

Eiginkona kokksins Jamies Olivers, Jools, missti fóstur í vor meðan á samkomubanni stóð. Jools, sem er 46 ára, hefur greint frá því að frá því hún eignaðist sitt fimmta barn 2016 hafi hún misst fóstur þrisvar, nú síðast í vor. Þessu deilir hún í hlaðvarpsþættinum Made By Mammas.

Jools hefur alltaf verið opinská um missinn og þegar hjónin fögnuðu 20 ára brúðkaupsafmæli minntust þau „fimm lítilla stjarna á himninum“ sem þau misstu frá sér. 

Hún segir að þau hafi lengi langað í sjötta barnið. „Já, virkilega, en ég er búin að missa fóstur þrisvar og það reynir á andlegu hliðina. Ég þarf að huga að því hvort það sé góð hugmynd andlega sem líkamlega þar sem ég er 46 ára. Þetta er eilítið vafasamt. Jamie er samt alveg til í þetta. Ég á ekki mikinn tíma eftir, kannski eitt ár. Svo loka ég þessum kafla í lífi mínu.

Læknirinn spurði hvernig mér liði. Ég hugsaði málið og þar sem þetta er fimmta fósturlátið er hugsunarhátturinn orðinn þannig að ég segi bara: Jæja, ég er ólétt, en það mun líklegast ekki heppnast þannig að ég held bara áfram. Ég er hætt að vera jákvæð.

Síðustu tvö fósturlátin hafa verið mér frekar hættuleg og fjölskyldan mín vill að ég hætti. Allir segja: Þú átt fimm heilbrigð börn nú þegar, vertu þakklát. Ég skil afstöðu þeirra en ég er bara hætt að segja þeim frá þessu. Ég sagði ekki mömmu minni frá síðustu óléttunni því hún hefði orðið svo áhyggjufull.“

• Blogga um frétt