Eignaðist kraftaverkabarn 47 ára

Bandaríska raunveruleikastjarnan Kenya Moore lætur gott af sér leiða með því að styrkja fólk sem þarf á tæknifrjóvgun að halda. Moore, sem er þekkt fyrir þátttöku sína í þáttunum The Real Housewives of Atlanta, eignaðist sitt fyrsta barn 47 ára eftir tæknifrjóvgun og kallar dóttur sína kraftaverkabarnið. 

„Beið næstum því allt mitt líf eftir því að eignast barn,“ sagði Moore í viðtali við People, „svo ég þekkti angistina sem fólk, sérstaklega konur, finnur fyrir; tilhugsunina um að ég gæti mögulega ekki eignast barn.“

Moore áttaði sig á að hún væri að renna út á tíma þegar hún varð fertug.

„Ég vildi ekki eignast barn ein. Ég vildi ekki verða einstæð móðir. Svo ég beið og eftir fertugt horfði ég upp og hugsaði: guð minn góður,“ sagði Moore sem kynntist þó ekki barnsföður sínum fyrr en hún var orðin 46 ára. Einu ári seinna eignuðust þau dóttur. 

Raunveruleikastjarnan segir dóttur sína vera kraftaverkabarn á fleiri en einn hátt. Auk þess sem Moore var eldri en flestar frumbyrjur kom dóttir hennar í heiminn einum og hálfum mánuði fyrir settan dag. Moore fór í keisaraskurð sem reyndist erfiður og tók mun lengri tíma en hefðbundinn keisaraskurður. 

„Ég kalla hana kraftaverkabarnið af því að þetta var barn sem allir sögðu að væru nánast engar líkur fyrir mig að eignast,“ sagði Moore í viðtalinu.

• Blogga um frétt