Bolluhringur með mjúkri ostamiðju

Lungamjúkar gerbollur og heitur ostur – góð blanda með góðri sultu. Virkilega góð uppskrift að gerbollum sem má nota á ýmsa vegu í veisluna. Hér einnig notuð fyrir uppskrift að brauði með míní-hamborgurum.

5 b hveiti

5 msk. heilhveiti

2 msk. þurrger

3 msk. sykur

2 tsk. salt

½ l volgt vatn

50 g brætt smjör

1 eggjarauða

Hitið ofn í 180 gráður. Hrærið þurrefnin saman í skál. Búið til gat í miðjuna og hellið vatni og smjöri þar ofan í. Blandið saman með sleif til að byrja með og hnoðið svo í höndunum. Athugið að þetta deig er frekar blautt og þarf ekki að hnoða það mikið. Látið hefast í klukkustund.

Að hefingu lokinni skal móta penar bollur. Hér þarf að hafa hveiti við höndina til að deigið klístrist ekki allt við mann, hveitistrá hendurnar aðeins fyrir hverja bollu, en það er þess virði því þær verða mjög mjúkar eftir bakstur.

Takið ostinn sem þið ætlið að hafa í miðjunni og raðið bollunum í kringum hann. Hafið smá bil á milli bollanna. Látið bollurnar hefa sig/taka sig aðeins aftur um stund. Fjarlægið ostinn. (Hér er ekki vitlaust að nota ost sem er í tréumbúðum, Stóri-Dímon, og nota umbúðirnar allan tímann, baka bollurnar með umbúðum) Hrærið eggjarauðu og smyrjið á bollurnar. Stráið birki- eða sesamfræjum yfir þær.

Stingið í ofn og bakið í um 10 mínútur. Takið þá út og látið ostinn í miðjuna eða ofan í formið. Bakið áfram í u.þ.b. 10 mínútur eða þar til bollurnar eru gullnar og osturinn mjúkur.

Ef þið viljið gera hringinn daginn áður skal nota ost með tréumbúðum eða nota lítið hringlaga form í staðinn sem má fara í ofn. Baka hann þar til hann er alveg tilbúinn, um 20 mínútur. Hita þá ostinn þegar á að bera hann fram og setja hann í formið, ofan í bolluhringinn. Berið fram og hafið góða sultu og annað ljúfmeti með.

Spínat- og þistilhjörtuídýfa með nachos-flögum

Ekta amerískur draumur. Ídýfa sem gengur í öllum boðum og partýjum, jafnt sumar sem vetur. Sniðug á hlaðborð þar sem fólk á öllum aldri kemur saman.

2 msk. ólífuolía

2 msk. smjör

1 lítill laukur, smátt saxaður

2 hvítlauksrif, smátt söxuð

4 msk. hveiti

1 ½ b. kjúklingasoð

1 ½ b. rjómi

1 b. rifinn parmesanostur

1 msk. sítrónusafi

1 msk. sykur

1 dós sýrður rjómi

1 b. rifinn cheddarostur

450 g frosið spínat, þítt

170 g niðursoðnir ætisþistlar

¾ tsk. Tabasco-sósa

Nachos-flögur

Bræðið saman olíu og smjör í potti á miðlungshita. Setjið lauk saman við og mýkið hann í 3-4 mínútur. Bætið þá hvítlauk saman við og bætið við öðrum 2-3 mínútum. Stráið hveiti yfir laukinn og hrærið í 3-4 mínútur, þar til blandan er gullin og áferðarfalleg. Hellið kjúklingasoði yfir í nokkrum hlutum og hrærið vel í á milli eða þar til blandan tekur að þykkna og hún verður kekkjalaus.

Komið upp suðu. Hellið þá rjóma saman við og hrærið vel svo úr verði kekkjalaus jafningur. Takið af hitanum og setjið parmesanost, sítrónusafa, sykur og sýrðan rjóma saman við og hrærið vel. Hrærið þá rifinn ost út í.

Kreistið umframvökva úr spínatinu, saxið það meira ef ykkur þykir þörf á og hrærið saman við blönduna. Látið renna vel af þistilhjörtunum og skerið þau smátt. Nú fara þau út í blönduna. Smakkið til með Tabasco-sósunni.

Setjið hita undir ídýfuna að nýju, hrærið vel í pottinum þar til osturinn er allur bráðinn og ídýfan áferðarfalleg. Berið hana fram heita með nachos flögum, heitum tortillum, bagettusneiðum eða því sem þið kjósið.

Fylltur brauðhleifur

Fallegt á borði og einfalt í matargerð. Gestir rífa sér einn og einn bita af heitu brauði með smjöri, kryddjurtum og mosarella-osti.

Góður og glænýr brauðhleifur

Mjúkt smjör

Steinselja, smátt söxuð

Mosarellakúla, söxuð

Rifinn parmesanostur

Sjávarsalt

Ferskt rósmarín

Hitið ofn í 200 gráður. Skerið langsum og þversum skurði ofan í brauðið, fjöldi skurða fer eftir stærð brauðhleifs, en þannig að hver biti sé um 1 ½ til 2 cm. Gætið að því að skera það ekki alveg niður svo það fari ekki í sundur! Takið undir brauðið og glennið það í sundur; með því er auðvelt að smyrja brauðið með mjúku smjöri, strá steinselju ofan í það, dreifa mosarella-ostinum, strá parmesanosti yfir og ofan í ásamt smá salti. Stingið rósmaríngreinum hér og þar.

Stingið í ofn og bakið þar til brauðið er vel heitt og osturinn vel bráðinn. Berið strax fram. Athugið að þetta brauð má gera daginn áður og geyma í kæli þar til því er stungið í ofn.

Amerískar smákökur

Það þarf að setja sig í spor fjórtán ára barna þegar sett er saman fermingarveisla og heyra það á þeim hvað þau vilja hafa og hvað þeim þykir gott. Amerískar smákökur, cookies, er eitthvað sem margir myndu nefna. Hér er ein ekta uppskrift sem klikkar ekki.

1 b. mjúkt smjör

1 b. púðursykur

1 egg

1 ½ tsk. vanilludropar

2 b. hveiti

1 ½ tsk. lyftiduft

1 tsk. salt

1 ½ b. Smarties eða M&M

Hitið ofn í 180 gráður. Hrærið saman smjör og sykur þar til létt og ljóst, bætið þá eggi saman við og hrærið ásamt vanilludropum. Setjið þurrefnin saman við og hrærið þar til allt hefur blandast vel saman og þá Smarties eða M&M. Hrærið varlega svo nammið brotni ekki allt.

Gott er að stinga deiginu í ísskáp í um hálftíma, móta þá litlar kúlur og setja á bökunarplötu. Athugið að deigið má geyma í ísskáp yfir nótt. Þrýstið létt ofan á kúlurnar með fingrunum. Bakið í 8-10 mínútur ef þið viljið hafa þær mjög mjúkar að innan en 12-14 mínútur ef þið viljið hafa þær stökkar.

Míní-hamborgarar

Heimalagaðir míní-hamborgarar eru girnilegir á vel framsettum matarbökkum og laða marga að. Þessir eru bornir fram með cheddar-osti, stökku beikoni, ediklöguðum rauðlauk og kaldri bearnaise-sósu.

Hamborgarar

500 g vandað nautahakk

3 msk. steinselja, söxuð

3 msk. estragon/tarragon, smátt saxað

3 msk. brauðmylsna

4 msk. rifinn parmesanostur

1 msk. dijon hunangssinnep

1 egg

Sjávarsalt og svartur pipar

cheddar-ostur, skorinn í sneiðar

stökksteikt beikon, smátt saxað

Hrærið allt hráefnið saman. Mótið litla hamborgara og geymið í ísskáp í a.m.k. klukkustund áður en þeir eru steiktir. Þetta má gera daginn áður og sömuleiðis má steikja þá daginn áður og geyma í kæli.

Áður er borgaranir eru bornir fram skal setja á þá þykka sneið af cheddar-osti og strá smátt söxuðu og stökku beikoni yfir. Á þann hátt er gott að geyma þá og stinga þeim svo beint inn í heitan ofn sem er á grilli áður en þeir eru bornir fram.

Rauðlaukur í ediki - meðlæti

1 rauðlaukur, sneiddur örþunnt

1 msk. hvítvíns- eða rauðvínsedik

1 tsk. sykur

1 tsk. salt

Hrærið allt hráefnið saman og látið standa í a.m.k. klukkustund áður en laukurinn er settur á hamborgarann. Laukinn má gera daginn áður.

Bearnaise-sósa:

Fyrir þá sem svo kjósa má gera heimalagaða sósu á hamborgarana. Hins vegar er mælt með því að kaupa vandaða kalda bearnaise-sósu sem má fá víða ef um mannmarga veislu er að ræða.

Samsetning:

Skerið brauð í tvennt. Smyrjið sósu á báða hluta, ekki spara hana því brauðin drekka svolítið í sig. Leggið heitan borgara á neðri hlutann, sem er með osti og beikoni, og setjið lauk þar ofan á. Lokið með efra brauðinu. Gott er að stinga tannstöngli eða pinna í gegnum borgarann og raða á bakka. Það er þægilegra fyrir gesti að þeir detti ekki í sundur þegar þeir sækja sér á disk.

Brownie með Marsbitum

Ekta brownie sem öllum þykir góð. Þessi hverfur fljótt í boðum. Einn Marsbiti fer í hvern kökubita.

250 g smjör

250 g súkkulaði

1 ½ b. hveiti

1 ½ b. sykur

1 ½ tsk. lyftiduft

3 egg

3 Mars-stykki

Hitið ofn í 160 gráður. Bræðið saman smjör og súkkulaði í potti. Látið blönduna kólna svolítið. Hrærið þurrefni saman í skál. Hellið súkkulaðiblöndunni saman við þurrefnin og brjótið eggin eitt af öðru út í. Hrærið vel en varlega og ekki of lengi.

Skerið Mars-stykkin í um hálfs sentimetra þykka bita. Hellið kökudeiginu í aflangt form, leggið Mars-bitana í þrjár til fjórar raðir ofan á deigið og alla leið niður. Bakið í um 30 mínútur eða þar til kakan er orðin bökuð að ofan en mjög mjúk í miðjunni. Stingið í hana með bökunarprjóni og hann skal koma örlítið óhreinn út. Gætið að því að baka kökuna alls ekki of lengi þá missir hún mýktina sem skiptir öllu máli. Kælið og skerið í litla bita þannig að einn Mars-moli sé í hverri sneið. Raðið fallega á bakka, stráið flórsykri eða kakói yfir.