Fyrirsætan Chrissy Teigen greindi óvart frá því á Instagram í vikunni að þriðja barn hennar og eiginmanns hennar Johns Legends væri drengur. Fyrir eiga þau dótturina Lunu og soninn Miles.
Teigen var að spjalla um óléttuna á Instagram í vikunni og fór óvart að vísa til barnsins sem „hann“.
„Barnið er mjög, mjög heilbrigt og hann er stór,“ sagði Teigen og greip svo fyrir munninn og sagði úpps. Í stað þess að eyða myndbandinu birti hún það og skrifaði undir að hún gæti alveg eins sagt fylgjendum sínum kynið.
Teigen hefur verið rúmliggjandi síðan 8. september síðastliðinn og á að vera í tvær vikur. Meðgangan er flokkuð sem áhættumeðganga því að fylgjan er ekki nógu sterk. Það veldur miklum blæðingum. Til að reyna að styrkja fylgjuna þarf Teigen því að vera rúmliggjandi.