Einkaþjálfarinn Kristbjörg Jónasdóttir og landsliðsfyrirliðinn Aron Einar Gunnarsson eiga von á sínu þriðja barni á næstunni. Kristbjörg er gengin rúmlega 38 vikur og vill að barnið komi í heiminn sem fyrst.
Kristbjörg greindi fylgjendum sínum á Instagram frá því í gær að sér liði vel fyrir utan það að það væri eins og húðin á maganum væri að slitna í sundur. Hún hefur einnig lítinn tíma til að hvíla sig þar sem hún á tvö önnur börn.
Hún greindi þó frá því að hún ætti tíma bókaðan í belgjalosun í dag. Þrátt fyrir að það hafi ekki virkað þegar hún eignaðist strákana tvo ætlar hún að reyna það. Hún segist hafa átt samræður um af hverju hún væri að flýta fyrir komu barnsins og útskýrði ástæðurnar vel í færslu sinni.
„Í fyrsta lagi finnst mér 38 vikur alveg nóg,“ skrifaði Kristbjörg. „Barnið er í rauninni tilbúið og það eina sem á eftir að gerast er að barnið stækkar og maginn fylgir og allt verður erfiðara, jafnvel góður svefn,“ skrifaði Kristbjörg og tók fram að þetta væri bara sín skoðun.
„Í öðru lagi er Aron að fara í vinnuferð þremur dögum eftir settan dag svo það væri mun betra ef ég fengi aðeins lengri tíma til þess að jafna mig eftir fæðinguna áður en hann þarf að fara þar sem við getum ekki fengið fjölskylduna hingað.“
Kristbjörg og Aron búa í Katar þar sem Aron spilar knattspyrnu fyrir Al-Arabi. Þau vita ekki kynið á þriðja barni sínu en Kristbjörg vonar að Aronsson eða Aronsdóttir komi í heiminn fljótlega.