Náttúruvísindastjarnan David Attenborough gaf Georg prins steingerving af tönn úr útdauðri tegund hákarls. Steingervinginn fann hann á Möltu og í fyrstu virtist sem Maltverjar vildu fá dýrgripinn aftur.
Í viðtali við Times of Malta virtist menningarmálaráðherra landsins, José Herrera, ætla að ganga í málið og gefið var í skyn að hann vildi tönnina heim. Sagði hann að menningarverðmæti Maltverja hefðu endað erlendis en ættu heima á Möltu.
Daginn eftir útskýrði talsmaður ráðuneytisins hins vegar að ráðherrann ætlaði ekki að gera neitt í máli Georgs.
Tönnina fann Attenborough í fjölskyldufríi á Möltu á 7. áratug síðustu aldar. Hún er talin vera um 23 milljóna ára gömul og er úr megalodon-hákarli.