Skólar um víða veröld hafa verið að leggja áherslu á að setja í námskrár sínar námskeið sem búa ungt fólk undir lífið.
Stella Maris College í Sydney í Ástralíu hefur vakið athygli fyrir áhugavert námskeið sem boðið var upp á nýlega til að valdefla táningsstúlkur með því að kenna þeim að skipta um dekk á bílum og athuga með olíuna svo eitthvað sé nefnt.
Frumkvæði að þessu hafði Galmatic-fræðslumiðstöðin þar sem fjórar konur tóku að sér að kenna stúlkum að umgangast bíla. Eleni Mitakos, ein þeirra sem fara fyrir verkefninu á vegum Galmatic, leggur áherslu á að þetta sé ekki bundið einungis við táningsstúlkur heldur konur á öllum aldri.
Amy Smith, aðstoðarskólastjóri Stella Maris College, segir að nemendum hafi þótt vinnustofan skemmtileg og nytsamleg. Þrír hópar með alls 40 stúlkum tóku þátt í námskeiðinu og var endurgjöf þeirra einstaklega jákvæð: Mikilvægt sé að kenna stúlkunum að stóla á sig sjálfar en ekki annað fólk í lífinu almennt.