Ekki virðist stefna í harða forræðisdeilu á milli leikarahjónanna Brian Austin Green og Megan Fox. Hjónin standa nú í skilnaði og sækja um sameiginlegt forræði yfir sonum sínum þremur sem eru átta, sex og fjögurra ára.
Fox sótti um skilnað í lok nóvember. Á sama tíma sótti hún um sameiginlegt forræði yfir börnum þeirra. Nú hefur Green svarað að því er fram kemur á vef ET. Þar kemur fram að hann vill einnig sameiginlegt forræði og krefst ekki meðlags frekar en Fox.
Hollywoodstjarnan Fox sótti einnig um skilnað frá Beverly Hills 90210-stjörnunni fyrir nokkrum árum. Skilnaðurinn gekk aldrei í gegn og stuttu seinna varð Fox ólétt að yngsta syni þeirra. Nú virðist hjónunum þó vera alvara en setja börnin greinilega í fyrsta sætið.