Rut Marín Róbertsdóttir er í 9. bekk Naustaskóla á Akureyri. Hún hefur áhuga á íþróttum og æfir fótbolta með Þór/KA. Hún fermdist hinn 29. ágúst í fyrra í Akureyrarkirkju.
„Mér fannst mjög gaman að fermast, en aðeins ólíkt því sem ég hafði ímyndað mér þótt í heild hafi allt verið mjög skemmtilegt.
Það var gaman að vera í kirkjunni með vinum mínum, að fá alla athyglina og eiga kósídag með fjölskyldunni.“
Hver var besta fermingargjöfin?
„Ég var heppin að fá gjafir og fullt af peningum þrátt fyrir að halda bara litla veislu.“
Hvernig var að fræðast um kristna trú?
„Mér fannst það alveg áhugavert en misskemmtilegt.“
Muntu nota þær hugmyndir sem voru kenndar í fermingarfræðslunni í lífinu?
„Já alveg mögulega einhverjar, en út af kórónuveirunni fórum við mjög lítið í fermingarfræðslu.“
Hvar keyptirðu fermingarfötin?
„Ég keypti kjól og bol í Gallerí 17 og Nike-skó í Útilífi.“
Áttu eitt gott ráð fyrir fermingarbörnin á þessu ári?
„Að njóta dagsins og byrja snemma að undirbúa svo maður sé ekki í neinu stressi.“