Katrín hertogynja af Cambridge er sögð vera hlý og góð móðir. Hún er oft á ferli með börnunum sínum, Georgi prins, Karlottu prinsessu og Lúðvíki prins, og margir dást að því hve börnin eru vel upp alin.
Dr. Rebecca Chicot segir hana tileinka sér nútímaleg uppeldisráð sem eru ólík þeim sem tíðkuðust hér áður fyrr þegar ekki átti að heyrast í börnum.
Í brúðkaupi Pippu Middleton árið 2017 var Georg prins (þá sex ára) byrjaður að vera nokkuð ódæll. Katrín snerti hann laust á höfuðið til þess að minna hann á að haga sér vel auk þess sem hún sussaði á hann þegar athöfnin var að byrja.
„Það að hjálpa börnum að sjá muninn á réttu og röngu er mikilvægur þáttur í því að vera gott foreldri. Það er mjög erfitt fyrir foreldra að þurfa að ala upp börn á almannafæri,“ segir dr. Chicot. „Hún virðist vera mjög góð í að nálgast börnin með snertingu og nær þannig að tengjast þeim.“
Bæði Katrín og Vilhjálmur eru dugleg að beygja sig niður til þess að ná augnsambandi við börnin sín á meðan þau tala við þau.
„Hún ætlast ekki til þess að börnin hagi sér eins og fullorðnir og veit að það er eðlilegt að börn taki reiðiköst einhvern tímann á ævinni,“ segir Chicot.
Margir lofuðu Katrínu í hástert fyrir það hvernig hún brást við þegar Karlotta prinsessa ullaði á almannafæri árið 2019. Í stað þess að skamma hana hló hún og hvatti hana til þess að vinka til fólksins.
Þegar Karlotta prinsessa átti erfitt á ferðalagi kraup Katrín niður til hennar og notaði vísifingurinn til þess að gefa til kynna alvöru málsins. „Þetta gaf til kynna að henni væri alvara án þess þó að reiðast eða dekstra,“ segir dr. Chicot.