Fyrrverandi parið Irina Shayk og Bradley Cooper, sem eitt sinn var heitasta par í heimi, á saman eina dóttur. Ofurfyrirsætan og leikarinn reyna að halda dóttur sinni fjarri kastljósi fjölmiðla en nú breytti Shayk til og birti mynd af dóttur sinni á instagramsíðu sinni.
Hin fjögurra ára gamla Lea De Seine sést toga í móður sína á mynd og er þetta fyrsta myndin sem Shayk birtir af dóttur sinni að því er fram kemur á vef E!. Shayk stillti sér upp eins og fyrirsæta í fötum frá Burberry en sú stutta var klædd í litrík föt. Móðirin passaði að ekki sæist í andlit dóttur sinnar.
Shayk greindi frá því að „pabbi“ hefði tekið myndina. Á hún þar líklega við barnsföður sinn, hinn 46 ára gamla Cooper. Parið fyrrverandi er sagt ala dóttur sína upp saman í góðu.