Shameless-leikkonan Emmy Rossum eignaðist dóttur á dögunum með eiginmanni sínum, kvikmyndagerðarmanninum Sam Esmail. Þetta er fyrsta barn Rossum, sem tókst að fela óléttuna fyrir fjölmiðlum í kórónuveirufaraldrinum.
Leikkonan er 34 ára en eiginmaður hennar 43 ára. „Á björtum mánudagsmorgni klukkan 8:13 buðum við dóttur okkar velkomna í heiminn,“ skrifaði Rossum á Instagram. Hún birti tvær bumbumyndir af sér og fótspor dóttur sinnar.
Stjörnunum hefur gengið vel að fela meðgönguna í kórónuveirufaraldrinum. Fréttirnar komu mörgum aðdáendum hennar á óvart enda birti hún myndir af sér á Instagram síðustu mánuði en passaði að sýna ekki magann. Hún var ekki með í lokaþáttaröðinni af Shameless sem frumsýnd var 11. apríl. Vonast var til þess að hún yrði með en framleiðandi þáttanna sagði í viðtali í apríl að kórónuveiran hefði gert það ómögulegt.