Söngkonan Madonna hitaði upp fyrir úrslitaleik Englands og Ítalíu í gær þegar hún fylgdist með syni sínum, hinum fimmtán ára David Banda, spila fótbolta úti á túni með kunningjum sínum.
Hin 62 ára, fimm barna móðir birti myndskeið á samfélagsmiðlinum Instagram. Þar má sjá Madonnu ásamt börnunum sínum eiga huggulegan sunnudag og fylgjast með David Banda í fótbolta. Söngkonan lifir sig inn í leikinn og hvetur drenginn áfram sem skorar svo gott mark.
„Nú er komið að úrslitaleiknum í Evrópukeppninni í fótbolta! Áfram Ítalía,“ skrifaði Madonna sem er af ítölsku bergi brotin.