Georg prins þykir með eindæmum líkur föður sínum, Vilhjálmi Bretaprins, á 8 ára afmælismynd sinni sem var birt í vikunni. Breskir fjölmiðlar hafa vakið athygli á líkindunum og birt gamlar myndir af Vilhjálmi.
Prinsinn litli fagnaði afmæli sínu á fimmtudaginn og í tilefni dagsins birtu foreldrar hans mynd af honum, líkt og venjan er innan konungsfjölskyldunnar. Myndin sýnir prinsinn skælbrosandi á húddi Land Rover-bifreiðar, sem var eftirlætisbifreiðategund langafa hans, Filippusar hertoga af Edinborg, sem féll frá fyrr á þessu ári.