Tónlistarmaðurinn Jason Derulo og kærasta hans Jena Frumes eru hætt saman, aðeins fjórum mánuðum eftir að þeim fæddist sonur. Derulo sagði frá sambandsslitunum á samfélagsmiðlum í vikunni og bað um frið frá aðdáendum.
Frumes fæddi soninn Jason King 8. maí síðastliðinn og er hann þeirra eina barn saman.
„Við Jena höfum ákveðið að fara hvort í sína áttina. Hún er mögnuð mamma en okkur finnst við vera besta útgáfan af sjálfum okkur þegar við erum í sundur og líka betri foreldrar,“ skrifaði Derulo á Twitter.
Frumes og Derulo eiga sama afmælisdaginn, 21. september, og þann dag birti Frumes afmæliskveðju til Derulos á Instagram þar sem hún sagði einnig frá því að þau hefðu fagnað afmælinu saman í Aspen. Hún eyddi færslunni síðar.