Athafnakonan og fyrrverandi raunveruleikastjarnan Kylie Jenner á von á sínu öðru barni. Hún klæddi sig upp á dögunum í óvenjulegan og þröngan samfesting sem gerði myndarlega óléttukúluna sýnilega.
Eldrauði samfestingurinn er óvenjulegur enda með áföstum hælaskóm og hönskum. Utan yfir var hún í kápu í sama lit. Hún birti myndir af sér í fötunum á Instagram-síðu sinni og merkti fatahönnuðinn Richard Quinn. Jenner minnti töluvert á stóru systur sína Kim Kardashian þegar Kardashian klæddist svipuðum fötum á Met Gala-viðburðinum í september. Föt Kardashian voru hins vegar svört og frá tískumerkinu Balenciaga.
Heimsbyggðin fær að fylgjast með meðgöngunni ólíkt því þegar Jenner gekk með sitt fyrsta barn. Jenner sem er aðeins 24 ára staðfesti í byrjun september að hún ætti von á sínu öðru barni með barnsföður sínum Travis Scott en þau hafa verið sundur og saman síðan dóttir þeirra Stormi kom í heiminn í febrúar 2018.