Khloé Kardashian leggur sig alla fram um að hlúa að sterkri sjálfsmynd dóttur sinnar sem er þriggja ára. Sjálf hefur Kardashian átt erfitt með eigin sjálfsmynd og þurft að þola mikla fitusmánun í gegnum tíðina.
„Ég hef átt í erfiðu sambandi við mat,“ segir raunveruleikastjarnan í samtali við tímaritið Health. „Það var engin ein manneskja þar að baki, ég held að það var samfélagið í heild sinni eða hvernig fólk gagnrýndi líkama minn. Ég leik ekki með þegar kemur að True. Hún er mjög hávaxin og fólk segir alltaf að hún sé svo stór. Ég leiðrétti það og segi að hún sé hávaxin. Ég passa upp á að valin séu rétt lýsingarorð. Ég veit hvað fólk meinar en ég vil ekki að barnið mitt misskilji neitt.“
„Þegar ég var yngri og var leið þá borðaði ég. Ég borðaði tilfinningar mínar. Svo hataði ég hvernig mér leið eftir á. Ég var næstum því að refsa mér fyrir að borða of mikið eða fyrir að fá mér snakk. Þetta varð ákveðin þráhyggja. Ég hafði reynt alla megrunarkúra sem finnast undir sólinni. Þess vegna sveiflaðist þyngdin mín svona mikið. Ég var alltaf að reyna að finna skyndilausn.“
„Þegar ég byrjaði að stunda líkamsrækt þá ákvað ég um leið að gera ákveðnar lífsstílsbreytingar. Ég tók margar litlar ákvarðanir. Eina vikuna ákvað ég að gera aðeins eina breytingu, taka út allan sykur. Svo ákvað ég að gera það í mánuð. Svo fór ég að reyna smátt og smátt að bæta við fleiri heilbrigðum venjum.“
Khloé hefur áður tjáð sig um erfiðleika sína hvað sjálfsmynd hennar varðar. Ekki er langt síðan það birtist mynd af henni ótilhafðri á sundfötum, án þess að átt hefði verið við myndina. Uppi varð fótur og fit í herbúðum Kardashian-fjölskyldunnar og öll vopn beitt til að myndin hyrfi úr netheimum.
„Þegar þú ert manneskja sem hefur glímt við slæma sjálfsmynd alla ævi og einhver tekur mynd af þér sem þér finnst ekki falleg, er í slæmu ljósi eða líkaminn þinn lítur ekki vel út á henni og endurspeglar ekki alla vinnuna sem þú hefur lagt í hann, þegar þessi einhver birtir þessa mynd, þá ættir þú að hafa allan rétt á því að biðja um að láta ekki deila þeirri mynd, sama hver þú ert,“ sagði Kardashian.